ДҮДҮ.МН-ийн зүгээс шинээр хэрэгжүүлэх төсөл хөтөлбөрүүдээ өргөн хүрээнд,  тогтвортой явуулах үүднээс санхүүжилт олох төрөл бүрийн ажлуудыг санаачилан хэрэгжүүлдэг бөгөөд эдгээрийн нэг хэлбэр нь “Дүдү модон тоглоом”-ын үйлдвэрлэл юм. Уг үйлдвэрлэлийн хүрээнд хүүхэд багачуудад сөрөг нөлөөгүй, удаан эдэлгээтэй, цэвэр экологийн тоглоомуудыг үйлдвэрлэн, хүүхдийн тоглоомын “ДҮДҮ” брэндийг гаргахаар зорьж байна.

 Модон тоглоомын үйлдвэрлэлийн хамгийн эхний бүтээгдэхүүн нь хүүхдийн “ДҮДҮ ХАУС” юм.

 Хүүхдийн Дүдү хаус нь зуслангийн хашаа, амралт зугаалгын газар, хүүхдийн цэцэрлэг, өдөр өнжүүлэх төв, тэр бүү хэл гэртээ тавьсан ч болохоор авсаархан бөгөөд, зөөж тээвэрлэхэд тохиромжтой угсарч, эвхэгдэх зориулалтайгаар бүтээгдсэн байна.

 Монголчууд бид эрт дээр үеэс хүүхэд ахуй цагтаа чулуугаар гэр хийн айл гэр болон тоглож өссөн байдаг. Энэ нь  хүүхдүүдэд бие дааж сурах, бусадтай харилцаж сурах, өөрийн эд юмсийг ариг гамтай эдлэх хэрэглэх, арвижуулах арга ухаанд сургахад чухал нөлөө үзүүлсээр ирсэн.

Тэгвэл өнөө цагийн хүүхэд багачууд Дүдү хаустай болсноор амьдрах ухааны эдгээр аргуудад суралцахаас гадна айл хөрштэйгөө хамтран орчин тойрноо тохижуулах, илүү цэвэр цэмцгэр, эмх цэгцтэй байх гэх мэт их хотын суурьшмал соёлд суралцах болно.