ДҮДҮ.МН порталын үндсэн зорилтуудын нэг нь хүүхэд өсвөр үеийнхэн, тэр дундаа мэдээллийн хомсдолд байгаа алслагдсан хороо, дүүрэг, сум, орон нутгийн хүүхэд багачуудад амьдрах ухааны хэрэгцээт мэдээллийг нь сонирхолтой хэлбэрээр хүргэх явдал юм.

Хүүхэд өсвөр үеийнхэнд хийсэн олон төрлийн судалгаануудын тайлан дүгнэлтээс харж байхад тэд өөрсдийн хэрэгцээт мэдээллийг ихэвчлэн найз нөхөд, ТВ, радио, интернэт, хүүхдэд зориулсан сонин сэтгүүлээр дамжуулан авдаг байна.

Харамсалтай нь дээр дурдсан алслагдсан хороо, дүүрэг, сум орон нутгийн хүүхэд багачууд нь өөрсөддөө хэрэгтэй мэдээ мэдээллүүдийг хангалттай авч чаддаггүй бөгөөд авч буй багахан мэдээлэл нь цаг хугацааны хувьд хоцрогдож хүрдэг байна.

Тиймдээ ч тэд хүүхдэд зориулагдсан олон нийтийн арга хэмжээнд оролцож буй оролцоо, боловсролын түвшин, хөгжил хамгаалал, эрүүл мэнд зэрэг нь төв суурин газрын үе тэнгийнхнээсээ хамаагүй доогуур түвшинд байдаг нь судалгаанаас төдийгүй бодит байдал дээр тодорхой харагддаг.

Тэр бүү хэл гэмт хэрэгт өртөх, муу зуршилд автаж буруу замд орох, зам тээврийн осолд өртөх нь магадлал маш өндөр байдаг байна.